एक धाव महिला सुरक्षितेसाठी; महिला मिनी मॅराथॉन स्पर्धा!

५०० हून अधिक महिलांनी घेतला सहभाग

स्वीप अंतर्गत महिला मिनी मॅरेथॉन कार्यक्रमामध्ये मतदान जनजागृती

 रोटरी क्लब ऑफ पनवेल सेंट्रल व पनवेल महानगरपालिका यांच्या संयुक्त विद्यमाने पनवेलमध्ये महिला सुरक्षितता व मतदान जनजागृती अभियान या विषयांना अनुसरून महिला मिनी मॅराथॉन स्पर्धा रविवार दिनांक १७ नोव्हेंबर २०२४ रोजी पनवेल शहरातील वडाळे तलाव परिसरात आयोजित करण्यात आली.

रोटरी क्लब ऑफ पनवेल सेंट्रल ही संस्था गेली पस्तीस वर्षे डॉ. गिरीश गुणे यांच्या मार्गदर्शनाखाली पनवेल शहर व तालुक्यातील विविध भागात शासकीय, निमशासकीय तसेच विविध सामाजिक संस्थांच्या सहकार्याने अनेक लोकोपयोगी प्रकल्प करत असतात.त्या अनुषंगाने पनवेल 'एक धाव महिला सुरक्षितेसाठी व मतदान जनजागृतीसाठी' हे ब्रीद वाक्य ठेऊन केवळ महिलांसाठी मिनी मॅराथॉन आयोजित करण्यात आली. या मध्ये ३ किलोमीटर, ५ किलोमीटर व सेलिब्रेटीनींसाठी १ किलोमीटर असे अंतर ठेवण्यात आले. स्पर्धेपूर्वी प्रथम सर्व स्पर्धक महिलांसाठी झुंबा व्यायाम प्रकार आयोजित केला होता व स्पर्धेनंतर महिलांना स्वसंरक्षण कसे करावे याबाबत आंतरराष्ट्रीय व राष्ट्रीय तायकॉन्डो खेळाडूंनी प्रात्यक्षिक दाखवून प्रशिक्षण दिले. पनवेल महानगर पालिकेच्या सहाय्यक आयुक्त रुपाली माने, समाजविकास अधिकारी स्वप्नाली चौधरी, नगर रचनाकार अनिता नेरकर यांच्या सोबतीने दोन वासुदेवांनी मतदानाविषयी उपस्थितीताना जनजागृती केली. या स्पर्धेत अनेक महिलांनी उत्साहाने सहभागी होऊन ही स्पर्धा यशस्वी केली. या प्रसंगी रोटरी डिस्ट्रिक्ट ३१३१ चे माजी प्रांतपाल रो.डॉ. गिरीश गुणे, माजी प्रांतपाल रो.डॉ. अनिल परमार,नियोजित प्रांतपाल (२०२७ - २८) रो.नितीन ढमाले सहकुटुंब, मुख्य प्रयोजक ओरियन मॉलचे मंगेश परुळेकर यांची कन्या मनांकी यांच्यासह अनेक मान्यवर उपस्थित होते.